Asasakka ilinniarnertuunngortut. Nalliuttorsiutinginissassinnut pissutissaqarluarluta maani GUX Aasianni sulisut qanigisasilu katersuuppugut.
Ulloq pingaartorsiorfipput kiisami nallerpoq ilissinnut ukiuni kingullerni marlunni pingasunilu piareersarfigisimasarsi. Atuagarsornikkut inuttullu inerisimanerulersimavusi.
ILAMI ullut tamaasa ulloq manna anguniarneranut kaammattorlusilu taperseruisarsimaqaagut.
---------------------------
Qularutiginngilluinnarpara ukiuni taakkunani ilissi immissinnut inuttut ilinniarlusilu ilinniaqatigiissimanersi annertussammat, nuannersorpassuarnik unamminartunillu misigiffiusarsimassalluni.
Ilissi ukioq 2025 ilinniarnertuunngortut naatsumik oqaatigissungussi, ilakkuminartuuvusi misileraasullusilu.
Ilami ilaanni misileraajuarnersi unaminartunik suliassaqartitsisarpoq. Atungassarititaasunut maninguunnersi annertuvoq.
Ilaatingullu oqaaseqarlusilu isummersuuteqartarnissarsi maqaasisarpara – ilakkuminaqaasili piffimmi maani maqaasissuatsigit.
----------------------------------------
Meeqqat atuarfianiik allaniilluunniit maanga nuukkassi pisut sungiusimasasi qimallugit ilassinnut sakkortusimavoq, amerlasuut atuarunnaarput – ILAMI AMERLAVALLAAT
Ilasilu unamminartorsioraluarlutik qujanartumik atuaannanikuupput – atuartuutitta taamatut inissisimasarnerat uatsinnut sulisunut ineriartortitsittuarnissamut aqqutaasarpoq.
Qujanartumillu aamma ilaqarpusi, atuarunnaaraluariarlutik atualeqqinnerminni massakkut atuarnerminnik naammassinnittut.
Uangummi ilinniarnertuunngorniarfimmi inuusuttut atungaannut naleqqussartuartuuvugut, inuiaqatigiit piumasaqaatinut, uppernassuseq ineriartortitsinerlu malinnaatitassaraavut sullissinerput pittanngorsartuartussaangatsigu.
-----------------------------
Ingerlaqqinnissassinni nalaatassasi ilaativut oqittuinnaassanngillat, akisussaaffimmilli tigusisinnaaneq pingingaanni pisunullu naleqqussarsinnaangaanni inuuneq sumiluunniit tulluussarnikkut ingerlanneqarsinnaavoq.
Oqarsinnaavungalu naleqqussaqatingiissimanerput sulisuusuvut ilissilu inuit ataasiakkaat inissisimanersi aallaavingalugu annertusimavoq.
----------------------
Kamaanneqartaqaagut, kisianni tamanna paasinnilluta atortarparput, ilami ukiukittunnguullusi angajoqqaasi qimallugit aallarnissinni saaffissatut qaninnerpaatut saaffingisaratsigut. Tamanna takussutissaasarpoq qaninnerpaatut isingilersimangatsigut nuannaarutissinnik, pakatsissutissainnik kamassasinnik annissuiffingisarpatsivut.
----------------------------------------
Inuusuttuaqqat misileraanerat takusarparput, ilami allaat puingunaattut ilangivaat 18-t ataallugit kollegiaanni 20-mi najungaqarallarmata isersimaartarfimmi allattuisoqarsimanera “meeqqanut parnaarussivik” qamuuna qungujunnarpoq, taamatut allattoqarsimanera, kisianni taamatut allattup takusinnaalernikuuaa suli meeraangamik nakkutingineqartariaqarlutik.
Inuiaqatigiinni meerartavut akisussaaffingaavut, uangalu erseqqissartuarpara maani atuarfimmi meeqqanut suminginnaasumik iliuuseqassanngittuvut, atuarfimmi kollegianilu.
------------------------------------------
Ilaqarpusi eqqiluisaarnissamik suli sungiussisimanngittunik, ingasinnaanngittunik, kisianni tamanna ajornannginnerutilersimavarsi piumaffingineqarnissigut arsaartunngikkaluarlusilu kaammattorneqartarnissivut ilikkarsimavasi.
Saliisarneq ilaanut unamminarsimaqaaq, allaat angajoqqaanik akulerussortoqarluni, kisianni Ilinniarnertuunngorniarfimmi inatsit malikkaanni pisussaaffingingatsigu atuartitsineq kisiat pinnangu tunngaviusumik inuttut ilisimasassasi aamma pingiliutsissallugit.
Uangummi ilinniaqqinnissamut piareersarfiinnaavugut – taamaattumillu ilinniakkamik aallartitsinissassinni nammineersinnaalerneruniarnissinnut aqqutissiuussisussaavugut ilinniaqqiffissassinnilu nammineersinnaanerulernissarsi anguniarlugu kaammattuisussaalluta.
Pisut amerlaqaat, ilasi nipilersullaqqittorujuupput, filmiliullaqqillutik timersullaqqittorujussullutillu, inuttullu pikkoriffisi siammaseqaat maaniinnissinnilu ataasiakkaarlusi killiffisi apeqqutaallutik assinginngitsunik kaammattorneqartariaqartarsimavusi ajussangaluaqaarmi inuttut ataasiinnartut sullinneqaraluarussi.
Aamma taamaappoq atuangarsornikkut pinginnaanisi – taakkualu tassaapput ataasiakkaarlusi atuartinneqarnissinnut aallaaviusartut ilaat.
Qujavungalu atuarfitta nittarsaalluarsimaneranut peqataasarassi, ilisseqanngippammi atuarfipput anersaaqarani ingerlasinnaanngimmat – manna iluatsillugu qujaffingaassi.
(Pisut ilamininngui eqqaassangukkit -ajornerumaat minillugit)
18-t ataallugit ukiullit baajaatiminnik arsaarneqartunik ilaqarpusi, massa baaja ataasinnguamik arsaartissimallutik aappillernaralugu aanaveeraat uffa 18-lereeraluarlutik.
Ilaqarpusi kunngissap 18-liineranut qaaqqusaanikumik
Naammattoortillutik baajaatitik qimaannarlugit ingerlasoqarnikuuvoq
18-t ataallugit ukiulik ilisimatitsinngivilluni illoqarfimmut allamut aallarsimasoq, tammaaneqaqqasoq qujanatumik nassaarineqarnikuuvoq.
Niviaaluit angutaatiminnik errorsisarfiup matuatigut isaatitsisarnerat paasineqarnikuuvoq.
Niviaaluit marluullutik nukappiaraq ataaseq tamarmik pileringalugu aggeqqunikuungaluarpaat anillaqqullugu maani naammassisut akornanni.
Inimini pujortarluni naammattoortittoqarnikuuvoq, uffa inini pujortartoqaqqusaanngittoq-
Massa naammattoortereerluni suli isertorusunnermut kinguliani allanngorlugu atini taangaa
Donutsiliullammammik ingarissumik ilaqarpusi
Misilitsinnermi snydertoqarnikuuvoq.
Massa suli atuarluni aanakassanngortoqarnikuuvoq.
18-leeernikunut usorulluni angajoqqaaminut inuujaarsimannginnerminik naammangittaalliortoqarnikuulluni.
ILAMI pisut amerlanikooqaat, ajornerumaat eqqaanngiinnarpakka. Qularinngilarali paasineqarasi iliuutsisi arlaqarsimassasut.
---------------------------------
Taamakkuali inuusuttunik sullissinermi nalinginnaasuupput aammalu ilinniarnertuunngorniarfimmi ningiutut killiliisariaqarnermi sulisut atuartuniik pittaaneruallaartanngillat, kisianni inuppassuit ataatsimoorfiinni ataqqeqatingiinneq tamanillu inissaqartitsineq pisussaamma tamanut ajunngittussaq anguniarlugu killiiliisariaqartarpunga tamannalu aamma pineqartunut tamanullu avatangiisaannut pittaanerusussaq anguniarlugu aalajangiisariaqarneq pisarpoq.
Nuannareqqusaarlunimi sulisoqaneq ajormat, sulinermilu malitassaqarmat aalajangersakkallu aallaaviusussaapput – tamannali paasingaangassiuk siuariaateqarnersi takusinnaallugu sinnerlusi nuannaarneq pisarpoq.
Tamassi maani naammassitinnissarsi anguniangaasimavoq, kisianni ilarpassuaqarpusi killilerneqarlutillu atuarunnaartitaasimasut aamma namminneerlutik atuarunnaarsimasut.
-------------------------------
Kinaangaluartorluunniik inuttut siuariaraangat sinnerlusi nuannaarnartarpoq, ilami isingilerlusi atuangarsornikkut siuariaatisi inuttullu ineriartornersi annertusimapput.
Inuusuttuaraallusi aallartikkassi, inuusuttuunermut ikaarsaarsimallus ilasilu aamma inersimasuunermut ikaarsaarsimapput.
Tamannaavoq aamma eqqarsaatit misingisimasat itinerulernerannik kinguneqartartoq, takussutissaasorlu misileraavallaarunnaarluni inersimasutut inuunissamik toqqaanermut ilaasoq.
Tamanna ilaanut qullerpassuarnik kinguneqartarpoq allaat angajoqqaanut kamammik pilersitsisarluni, kisianni nakkaannarasi inissitsiterinissivut, tusarnaarneqarnissivut oqaloqatinginnittarnissivut sapiillusi aqqusaakkassinnut ilaapput.
---------------------------
N klasset inersimasuungaluarlutik aamma ajornerunngillat inuunertik ilusilersoreernikuungaluarlugu atualeramik nalilersuillutillu pissutsiminnik nalilersuinikooqaat unamminartorsiornikuupput aappariinnerliornerit ilanngullugit aqqusaartornikuuaat.
Taamaakkaluartorli ataatsimoorussaraarsi malitassat ataatsit maani malikkassigit anguniagarlu ataasiummat ullumikkut allagartartaarpusi.
---------------------------------------
Ullumikkut tamanna pillugu persuarsiutingaatsigit ilami ullut ataasiakkaarlugit inuusariaqatarnersi unamminartut inuttut atuagarsornikkullu amerlasimaqimmata angusasi pillugit nuannaartussaangatta.
--------------------------------
Ullumikkut nunatta avannaani ilinniarnertuunngortut pillugit katersuunnitsinni eqqaamassuarput ilinniagaqarneq suli annertuumik qaffarsartariaqaratsigu; inuiaat eqqarsartaatsitsinni pingaarutilittut inississuarput angajoqqaajungutta inuiaqataanguttaluunniit.
Tamannalu aamma Naalakkersuisoqatiginngortut pingaarnerutitaminnut ilanngunnikuummassuk qujaniarnaqaaq, nunatta aqutsisuinik pingaartinneqarluni naqissuserneqarmat.
Ilissi ilinniarnertuunngortut inuiaqatigiinni suliassasi amerlaqaat, nuannaarutigissangaluarapara ilasi maani ilinniagaqareersimallutik maani ilinniartitsinermi suliaqalersinnaappata, ilissimi timikkut tarnikkullu misiginikuuarsi inuiaqatigiit ilinniartitaanerput suli kulturitsinnut tulluussartariaqartoq. Ilissiuvusilu inuusaatsitsinnik ilisimasaqarnerpaat - akisussaaffik tigusiuk allanngueqataallusilu.
-----------------------------------
Sunngortoqarsinnaavorluunnit upperingaanni, kisianni namminiusseq pigingaanni tamanna aatsaat anguneqarsinnaavoq. Namminiussutsissinnik arsaarneqarsinnaanngilasi, ukiunili maaniiffissinni pisariaqartarsimavoq killiliillunilu oqaaqqissaarisarnissaq.
Inuiaqatigiit inuusuttortatsinnut piumasavut annertupput soorlu ilinniagaqaritsi, suligitsi inuiaqatigiit piumassat malillugu inooqataagitsi allarpassuillu piumasaasut.
Maani atuartuunersi inuunissinnut ilaalluinnarpoq, tassami ukiut taakkua inuusuttuunermi pisut eqqaamajuangassat ilagissammatigit, kingumut qiviartuartartussaavasi kammalaatisi allaat ilaquttatut qaningisatut isigilersimasasi maani naapissimangassigit.
--------------------------------
Maani sulisut eqqaamasassassi ilangaat naak ilaatigut killiliisarnerat ilissinnut puffaammernarlunilu isumaqatiginaannanngikkaluartoq - taamaattorli qularinngilara kingumut qiviarnissinni naleqartilerumaarisi, taakkuummata inuunissinni saaffissaallutillu oqilisaasimasut.
-----------------------------------
Angajoqqaat allallu qaningisaasut ilissinnuttaaq qujajumavunga tatinginnillusi meeqqasi maaniitsissimangassigit. Meeqqasi illoqarfeqatinginngikkaluarlugu tapersersortuartarassigit tamatsinnut oqilisaataasarsimavoq annertooq. Ullormi pingaartorsiorfimmi ilanngullusi pilluaqquassi.
Ulloq manna ilinniarnertuunngortunut angajoqqaat, qaningisaasut sulisullu ataatsimoorussaraarput ullumikkut ilinniarnertuunngortut anguniangaqarneranni kaammattuisimanerput killiliisarsimanerpullu.
Taamatut oqaaseqarlunga ullumikkut ullorsiorluaqquassi siunissamilu ajunngitsunik tamanik kissappassi.
Naggataatingullu nikuilluta ilinniarnertuunngortut pingasoriarluta hurrarutigissavavut kissaatingaara.